Ծագման երկրի հավաստագրի պահանջներ՝ ՌԴ էլեկտրոնային առևտրի հարթակներում վաճառքի համար
14/05/2026
ՀՀ Էկոնոմիկայի նախարարության կողմից ներկայացված տեղեկատվության համաձայն՝ ՌԴ էլեկտրոնային արևտրի հարթակների, մասնավորապես՝ WILDBERRIES – ի և OZON-ի միջոցով Հայաստանում (նաև ԵԱՏՄ- ում) արտադրված ապրանքների վաճառքի համար անհրաժեշտ է ծագման հավաստագիր, որը տրամադրվում է ՀՀ ԱԱՊ-ի կողմից։
Ծագման հավաստագիր ստանալու համար անհրաժեշտ է ներկայացնել մի շարք փաստաթղթեր, որոնք հանդիսանում են պարտադիր պայման ըստ 2009 թ. նոյեմբերի 20-ին ստորագրված «Անկախ Պետությունների Համագործակցության (ԱՊՀ) անդամ պետությունների ապրանքների ծագման երկրի որոշման կանոնների մասին» համաձայնագրի։
Ստորև ներկայացնում ենք ՀՀ ԱԱՊ կողմից ապրանքի ծագման հավաստագիր տրամադրելու համար պահանջնվող փաստաթղթերի ցանկը (համաձայն՝ ՀՀ կառավարության 30 դեկտեմբերի 2010թ․ թիվ 1772-Ն որոշման).
ԾԱԳՄԱՆ ԵՐԿՐԻ ՀԱՎԱՍՏԱԳԻՐ (ՍԵՐՏԻՖԻԿԱՏ) ՍՏԱՆԱԼՈՒ ՀԱՄԱՐ ԱՆՀՐԱԺԵՇՏ Է ՆԵՐԿԱՅԱՑՆԵԼ ՀԵՏԵՎՅԱԼ ՓԱՍՏԱԹՂԹԵՐԸ.
ա. դիմում-հայտարարագիր` համաձայն N 1 (ծագման երկրի հավաստագրի տրամադրման մասին) եւ N 1.1 (ծագման երկրի փորձաքննության կատարման) ձեւերի (տեղադրված է կայքէջում),
բ. հումքի ձեռքբերմանը եւ ծագման երկրին վերաբերող փաստաթղթեր,
(Այդպիսիք են` հարկային հաշիվ, հաշիվ ֆակտուրա, գնման ակտ, ներմուծված լինելու դեպքում նաեւ մաքսային հայտարարագիր) ինչպես նաեւ՝ փաստաթղթեր, որոնք հավաստում են արտահանվող ապրանքի՝ Հայաստանի Հանրապետությունում արտադրվելու մասին (Օրինակ` գյուղմթերքի դեպքում - տեղեկանք համայնքի ղեկավարից, հանքանյութի դեպքում - արդյունահանման լիցենզիա, թույլտվություն)
գ. տեխնոլոգիական քարտեր կամ այլ փաստաթղթեր, որոնց հիման վրա իրականացվում են արտադրական գործընթացները,
(Օրինակ` տվյալ ֆիզիկական կամ իրավաբանական անձի կողմից կատարված տեխնոլոգիական պրոցեսների համառոտ նկարագիր` նշելով օգտագործած հումքերը եւ փուլերով կատարած տեխնոլոգիական պրոցեսները, որոնց կատարման արդյունքում ստացվել է վերջնական արտադրանքը)
դ. ապրանքների առաքման ձեւակերպման փաստաթղթերի (հաշիվ-ապրանքագրի կամ դրան համարժեք` արտաքին տնտեսական գործունեության մեջ օգտագործվող այլ փաստաթղթերի պատճենները (Սույն ենթակետով պահանջված արտահանման փաստաթղթերից են` ապրանքի արտահանման պայմանագիրը ստացող երկրի հետ, ապրանքի հաշիվ ապրանքագիրը /ինվոյս/,տեղերի քանակը եւ քաշը պարունակող փաստաթուղթը/փաթեթավորման թերթիկ/) (սույն ենթակետով նախատեսված փաստաթղթերը ֆիզիկական անձինք ներկայացնում են ըստ իրենց ցանկության)
ե. հաշվապահական փաստաթղթեր, որոնք թույլ են տալիս պատշաճ կերպով որոշել ապրանքի ծագման երկիրը (Օրինակ` կախված օգտագործված հումքերի եւ արտահանվող ապրանքի ԱՏԳ ԱԱ ծածկագրերից, համաձայն ապրանքի ծագման երկրի որոշման կանոնների, հնարավոր է պահանջվի որոշել ծագման երկիրը ավելացված արժեքի եղանակով, նման դեպքերում պետք է ներկայացվի արտահանվող ապրանքի գնագոյացումը/կալկուլյացիա/)
զ. վճարման անդորրագիր (փորձաքննություն պահանջող ապրանքների համար սերտիֆիկատի տրամադրման վճարի չափը կազմում է 30 000 ՀՀ դրամ, իսկ փորձաքննություն չպահանջող ապրաքների համար՝ 10 000 ՀՀ դրամ)
Լրացուցիչ հարցերի առկայության դեպքում խնդրում ենք զանգահարել հետեւյալ հեռախոսահամարով՝ (+37460) 270 333