ՀՀ առևտրաարդյունաբերական պալատի նախագահ Մարտին Սարգսյանի շնորհավորական ուղերձը Կանանց միջազգային տոնի առթիվ։
09/03/2026
Սիրելի կանայք, ջերմորեն շնորհավորում եմ Կանանց միջազգային տոնի՝ Մարտի 8-ի առթիվ և բարեմաղթում լավագույնը անձնական կյանքում ու աշխատանքում։ Երկրների քաղաքակրթության մակարդակը հատկապես մեր օրերում որոշվում է նաև կանանց մասնակցության մակարդակով կյանքի բոլոր ոլորտներում։ Հայաստանում կանայք գրեթե բոլոր ասպարեզներում ակտիվ մասնակից են, իսկ հատկապես կրթության և առողջապահության ոլորտում՝ առաջատար։ Մենք ունենք կին լիդերներ, որոնք գործարար կապերի մեջ են նաև արտերկրի գործընկերների հետ, մասնակցում եմ համատեղ ծրագրերի իրականացմանը։
Մեր պալատի կարևոր ուղղություններից մեկը գործարար կանանց զորակցությունն է։ Փառք ու պատիվ ձեզ, որ կարողանում եք ընտանիքի հոգսը և գործարարությունը համատեղել, այլապես ավելորդ շռայլություն է կանանց միտքն ու եռանդը սահմանափակել խոհանոցի շրջանակներում։ Հայտնի խոսք է՝ երկրի ապագան մայրերի ձեռքերում է։ Դուք եք կերտում զինվորին ու բժշկին, ուսուցչին ու քաղաքացուն․ մի խոսքով՝ երկրի ապագան։
Սիրելի կանայք, մաղթում եմ խաղաղ երկինք և առողջություն, ձեր սիրով ու ջերմությամբ երջանկացրեք բոլորին։ Աստված օգնական մեր խաղաղասեր ու աշխատասեր ժողովրդին։
Սիրով և ջերմությամբ՝ Մարտին Սարգսյան