ԳԵՈՐԳԻ ԲԱԼԱԲԵԿԻ ՆԱՆՅԱՆ
06/03/2026
Երկրային կյանքին հրաժեշտ տվեց մի վառ անհատականություն՝ Գեորգի Բալաբեկի Նանյանը, ով ՀՀ առևտրաարդյունաբերական պալատի հիմնադիրներից է, երկար տարիներ եղել է Կոտայքի մարզի առևտրաարդյունաբերական պալատի նախագահը։
Ուսումնառության և աշխատանքային բացառիկ հարուստ կենսագրություն ունի։ Գերազանցությամբ ավարտել է Երևանի Պոլիտեխնիկական և Ժողտնտեսության ինստիտուտները, ՍՍՀՄ նախարարների խորհրդին կից ժողտնտեսության ակադեմիան, Ռուսաստանի բնական գիտությունների ակադեմիայի անդամ է։ Նա տնտեսական գիտությունների թեկնածու է։ Գեորգի Նանյանը ղեկավար պաշտոններ է վարել բազմաթիվ հիմնարկ-ձեռնարկություններում։ Հեղինակ է շուրջ 30 գիտական գործերի և 6 գյուտերի։ Բազմակողմանի զարգացած և խորը իմացությամբ տնտեսական գործիչ Գեորգի Նանյանը Հայաստանի առևտրաարդյունաբերական պալատի համակարգում բացառիկ սեր ու հեղինակություն էր վայելում, նրա համոզիչ և փաստարկված առաջարկություններն ու մեկնաբանությունները սպառիչ պատասխանի իրավունքով ընդունում էին բոլորը, նրա խոսքից դասեր քաղում։
Ընտանիքի սիրասուն հայր ու հրաշալի ամուսին էր, կարեկից և աջակցող ընկեր, անկաշառ քաղաքացի ու բարեկիրթ մտավորական։ Վաստակած տնտեսական գործիչն արժանացել է բազմաթիվ պարգևների։ Գեորգի Նանյանի նման մարդկանց կենսագրությունը գրվում է ոչ թե տարիների թվարկումով, այլ արժանապատիվ վաստակով։
ՀՀ առևտրաարդյունաբերական պալատի ողջ համակարգը խորապես վշտացած է Գեորգի Նանյանի մահով և ցավակցում է Նանյանների գերդաստանին ու հարազատներին։
Հ․Գ․ Գեորգի Նանյանի հոգեհանգիստը կայանալու է Նորքի զանգվածում գտնվող Սուրբ Սարգիս եկեղեցում մարտի 6-ին ժամը 17-ին։ Հուղարկավորությունը տեղի կունենա մարտի 7-ին ժամը 13։00-ին նույն տեղից։