ՀՀ առևտրաարդյունաբերական պալատի նախագահ Մարտին Սարգսյանի շնորհավորական ուղերձը Մայրության և գեղեցկության տոնի առթիվ
07/04/2025
Սիրելի կանայք, ջերմորեն շնորհավորում եմ Մայրության և գեղեցկության տոնի առթիվ: Եթե աշխարհի կառավարման բանալին հիմնականում տղամարդկանց ձեռքում է, ապա երջանկության բանալին կանանց ափերի մեջ է: Կինն է գեղեցկացնում կյանքը, սեր ու ոգեղեն ուժ տալիս տղամարդուն, նրանց մղում հերոսական արարքների, շենացնում հայրենիքը, իր օջախը:
ㅤ
Քանի հազար տարի պոետների մուսան կինն է, պոեզիայի թագուհին... Եթե տասնամյակներ առաջ կինը հատկապես կրթության ու առողջապահության ոլորտում էր լիդեր, ապա այսօր այլևս չկա կարծրատիպը: Կինն արդեն բիզնեսում էլ արժանապատիվ դերում է, ստեղծում է աշխատատեղ և բարիք: Եթե պատերազմների ժամանակ կինը զինվորին սպասող մայր էր ու ամուսին, այսօր արդեն բանակում կինն էլ իր կենսագրությունն է կերտում՝ Մայր Հայրենիք...
ㅤ
Մայրը սիրո, խաղաղության, բարության և արժանապատվության աչքերով է նայում աշխարհին և կամենում, որ մայրական սրտով ու կամեցողությամբ գրվեն բոլոր սահմանադրություններն ու օրենքները, որ միշտ արդարություն լինի աշխարհում:
ㅤ
Երանի շուտ գա այն օրը, երբ Հայաստանում էլ մայրը առավոտյան իր ընտանիքի անդամների ուրախությամբ ուղարկի արժանապատիվ աշխատանքի, ժպիտով դիմավորի բանակից վերադարձող հաղթանակած զինվորին, ապրի այնպես, ինչին արժանի է նա: Սիրելի կանայք, շնորհավորական խոսքս ընդունեք իբրև եղբայրական աղոթք Ձեզ համար...
ㅤ
ՀՀ առևտրաարդյունաբերական պալատի նախագահ Մարտին Սարգսյան և ՀՀ ԱԱՊ Խորհուրդ