ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌԵՎՏՐԱԱՐԴՅՈՒՆԱԲԵՐԱԿԱՆ ՊԱԼԱՏ

Facebook

Twitter

Linkedin

Youtube

Search
 

«Բիզնեսի թափանցիկ վարման մեխանիզմները» թեմայով քննարկում Արարատի մարզի գործարար համայնքի ներկայացուցիչներիի հետ

«Բիզնեսի թափանցիկ վարման մեխանիզմները» թեմայով քննարկում Արարատի մարզի գործարար համայնքի ներկայացուցիչներիի հետ

Սեպտեմբերի 15-ին Արարատ քաղաքում մեկնարկեց «Բիզնեսի թափանցիկ վարման մեխանիզմները» թեմայով քննարկումների շարքը փոքր և միջին բիզնեսի ներկայացուցիչների հետ: Քննարկման նպատակն էր բարձրացնել Արարատի մարզի գործարար համայնքի իրազեկվածությունը ոլորտին առնչվող օրենսդրական փոփոխությունների վերաբերյալ և վերհանել այն խնդիրները, որոնք թույլ չեն տալիս փոքր և միջին բիզնեսին ճկունություն ցուցաբերել՝ հատկապես համավարակի պայմաններում գործունեություն ծավալելիս: ԱՄՆ Միջազգային Մասնավոր Ձեռնարկատիրության Կենտրոնի (CIPE) հետ համագործակցությամբ՝ ՀՀ ԱԱՊ-ի կողմից կազմակերպված հերթական քննարկմանը մասնակցեցին մարզի  գործարար համայնքի և պետական հաստատությունների ներկայացուցիչներ, որոնք կիսվեցին իրենց մտահոգություններով հարկային և աշխատանքայի օրենսգրքի փոփոխությունների վերաբերյալ, բարձրացրեցին ոլորտին վերաբերող կարևոր հարցեր և հանդես եկան մի շարք առաջարկություններով:

ՀՀ առևտրաարդյունաբերական պալատի գործառնական տնօրեն Վլադիմիր Ամիրյանը մասնակիցներին նեկայացրեց հադիպման նպատակը, օրակարգային հարցերը և հորդորեց ակտիվ մասնակցություն ցուցաբերել քննարկմանը՝ ներկայացնելով առաջարկություններ: ՀՀ ԱԱՊ ֆինանսատնտեսական հանձնաժողովի նախագահ Վլադիմիր Շատվերովը մասնակիցներին ներկայացրեց վերջին ժամանակաշրջանում հարկային և աշխատանքային օրենսգրքերում կատարված փոփոխությունները, դրանց կիրառման ընթացքում առաջացող հիմնական խնդիրները: Քննարկումն ամփոփեց ՀՀ ԱԱՊ ծրագրերի համակարգող-հակակոռուպցիոն փորձագետ Էդգար Մեհրաբյանը, ով խոսեց բիզնեսի թափանցիկ վարման մեխանիզմների մասին  և ներկայացվեց ՀՀ ԱԱՊ-ի կողմից մշակված հակակոռուպցիոն ուղեցույցի հիմնական դրույթները, ՓՄՁ-ների համար մշակված հակակոռուպցիոն կանոնակարգի օրինակելի ձևը, ինչպես նաև Պալատի կողմից ընդունված կանոնակարգը:

Մասնակիցների կողմից հնչեցվեցին մի շարք հարցեր և առաջարկություններ՝  ՀԴՄ կտրոնների կիրառման, հարկային ռեժիմի մի տեսակից մյուսին անցնելու և մի շարք այլ խնդիրների հետ  կապված: Սեմինարի ավարտին մասնակիցներին տրվեցին հավաստագրեր ՀՀ ԱԱՊ կողմից կազմակերպված քննարկմանը մասնակցելու համար:

Այս նախաձեռնությունը ՀՀ առևտրաարդյունաբերական պալատի հերթական քայլերից մեկն է՝ ուղղված մարզերում հակակոռուպցիոն իրազեկվածության բարձրացմանը, գործարար համայնքի խնդիրների վերհանմանն ու վերջիններիս ձայնն առավել լսելի դարձնելու գործում: Նմանատիպ քննարկումները լինելու են շարունակական և առաջիկայում նախատեսված են քննարկումներ Հայաստանի մի շարք մարզերի, ինչպես նաև Երևան քաղաքի գործարար համայնքների ներկայացուցիչներ հետ: Քննարկումների ժամանակացույցը շուտով հասանելի կլինի Պալատի կայքէջում: Բոլոր քննարկումների արդյունքում նախատեսվում է ձևավորել առաջարկությունների փաթեթ և ներկայացնել քաղաքականություն մշակող և իրականացնող մարմիններին: