ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌԵՎՏՐԱԱՐԴՅՈՒՆԱԲԵՐԱԿԱՆ ՊԱԼԱՏ

Facebook

Twitter

Linkedin

Youtube

Search
 

Հայաստան-Ինդոնեզիա

Հայաստան-Ինդոնեզիա

Նոյեմբերի 25-ին ՀՀ առևտրաարդյունաբերական պալատը հյուրընկալեց ինդոնեզական պատվիրակության՝ Հայաստանում Ինդոնեզիայի Հանրապետության դեսպան Յուդի Կրիսնանդիի գլխավորությամբ (նստավայրը Կիև, Ուկրաինա): Պարոն դեսպանը հանդիպման հենց սկզբում գոհունակությամբ նշեց՝ «Ես համոզված եմ, որ նոր կառավարության օրոք Հայաստանը կունենա լուրջ առաջընթաց: Կարևոր չէ, թե Ինդոնեզիան ունի 260 միլիոն բնակիչ, իսկ Հայաստանը՝ 3 միլիոն: Էականն այն է, թե ինչպես ենք համագործակցում: Ես ուսումնասիրել եմ Ձեր ժողովրդի պատմությունը և շատ բան գիտեմ: Համոզված եմ, որ այս հանդիպումը համագործակցության զարգացման խթան կդառնա»: Դեսպանությունը, Կառավարությունից բացի, իր հերթին աջակցելու է համագործակցության ցանկացած առաջարկի:

Ինդոնեզացի հյուրերին հետաքրքրեց համագործակցել հատկապես տուրիզմի ոլորտում, թեև նախապայմաններ կան նաև գյուղատնտեսության և այլ ոլորտներում էլ գործակցելու: Ինդոնեզիայից Հայաստան է արտահանվում հատկապես սուրճ, կոկոս, կակաո և գյուղատնտեսական այլ մթերթներ: Իսկ Հայաստանից Ինդոնեզիա է արտահանվում ոսկե զարդեր, պահածոներ և այլն:

ՀՀ առևտրաարդյունաբերական պալատի գործադիր տնօրեն Անդրանիկ Ալեքսանյանը կարևորեց այն հանգամանքը, որ Հայաստանը Ինդոնեզիայի համար կարող է դառնալ տարանցիկ գոտի հատկապես ԵԱՏՄ և Եվրամիության շուկաներ դուրս գալու համար՝ մանավանդ որ Հայաստանը օգտվում է անմաքս արտահանման GSP և  GSP+ արտոնյալ ռեժիմներից:

Պարոն դեսպանը տեղեկացրեց, որ հաջորդ տարում իրենք նախատեսել են Հայ- ինդոնեզական բիզնես ֆորում մայրաքաղաք Ջակարտայում և ակնկալում են հայաստանցի գործարարների ակտիվությունը: Իսկ որպես գործակցության առաջին քայլ՝ Անդրանիկ Ալեքսանյանը կարևորեց երկու երկրների առևտրաարդյունաբերական պալատների միջև համագործակցության հուշագիր ստորագրելը և գործակցության ոլորտների հստակեցումը: